Habari mpya kutoka nchini Ujerumani zimefichua kuwa tabia ya aliyekuwa kocha wa Liverpool, Arne Slot, ya kuchanganya ukosoaji wa kitaalamu na kiburi, pamoja na kuwapiga vijembe mastaa wapya wa timu hiyo, ndivyo vilivyochangia kwa kiasi kikubwa kufukuzwa kwake Anfield.
Slot aliongoza Liverpool kutwaa ubingwa wao wa pili wa Ligi Kuu ya Uingereza (Premier League) katika msimu wake wa kwanza tu klabuni hapo. Hata hivyo, mafanikio hayo yalianza kuhusishwa na misingi mizuri iliyoachwa na mtangulizi wake, Jurgen Klopp, hasa baada ya timu hiyo kuporomoka vibaya katika msimu wake wa pili.
Katika msimu huo wa pili, majogoo hao wa Merseyside walinusurika kuingia Ligi ya Mabingwa Ulaya baada ya kumaliza katika nafasi ya tano, huku wakipoteza mechi 19—idadi kubwa zaidi ya kupoteza katika msimu mmoja kwenye karne hii—na kuruhusu mabao 53, ambayo ni mengi zaidi kuwahi kufungwa kwenye Premier League. Ripoti zilidai kuwa Slot angeendelea kusalia klabuni hapo licha ya matokeo hayo mabaya, lakini Mkurugenzi wa Michezo, Richard Hughes, aliamua kuchukua hatua ya kumfuta kazi kocha huyo raia wa Uholanzi.
Vijembe na Dharau kwa Mastaa wa Bundesliga
Ripoti ya hivi karibuni kutoka gazeti maarufu la Ujerumani, BILD, imefichua kuwa moja ya matatizo makubwa ya Slot ilikuwa ni jinsi alivyokuwa akiongea na kushughulika na wachezaji nyota. Ingawa alisifiwa kwa jinsi alivyoshughulikia msiba wa mchezaji mwenzao Diogo Jota, alipoteza udhibiti wa kauli zake kwa wachezaji wengine, hasa wale waliosajiliwa kutoka Ligi Kuu ya Ujerumani (Bundesliga).
Wachezaji Florian Wirtz (aliyesajiliwa kwa pauni milioni 100) na Jeremie Frimpong (pauni milioni 30) walijiunga na Liverpool kutoka Bayer Leverkusen msimu uliopita wa joto, wakati Hugo Ekitike (pauni milioni 70) akiwasili kutoka Eintracht Frankfurt.
Inaarifiwa kuwa Slot alikuwa akitumia maneno ya kejeli na dharau dhidi ya watatu hao, akiwauliza maswali ya dharau kama:
"Hivi mshawahi kushinda Ligi Kuu ya Uingereza?"
Pia alikuwa akiwaambia:
"Huku Ujerumani ndiko mnaweza kucheza hivi."
Kauli hizi hazikupokelewa vizuri kabisa ndani ya chumba cha kubadilishia nguo cha Liverpool, hasa kwa kuzingatia kuwa kikosi hicho kina wachezaji wengi waliowahi kucheza Bundesliga kama Ibrahima Konate, Dominik Szoboszlai, Ryan Gravenberch, Endo Wataru, na Alexander Isak.
Sababu za Kuporomoka kwa Liverpool
Mbali na migogoro ya maneno, kulikuwa na sababu nyingi zilizotajwa kuchangia kuanguka kwa kiwango cha timu hiyo. Kati ya hizo ni pamoja na athari za kisaikolojia baada ya msiba wa mchezaji mwenzao Diogo Jota, mabadiliko makubwa ya kikosi baada ya usajili wa pauni milioni 450, pamoja na majeraha ya wachezaji muhimu.
Hata hivyo, dalili za Slot kuondoka zilionekana wazi pale nahodha na nguzo ya klabu hiyo, Mohamed Salah, alipojitokeza hadharani kwa mara ya pili msimu huo na kutaka klabu hiyo irejee kwenye mtindo wao wa zamani wa soka la kasi na nguvu maarufu kama 'heavy-metal football', ambao ulileta mafanikio makubwa chini ya Klopp.
Andoni Iraola na Onyo la Jamie Carragher
Siku ya Alhamisi, Liverpool ilitangaza kumteua Andoni Iraola kama mrithi wa Arne Slot huko Anfield. Ingawa mashabiki wengi wanaamini kuja kwake kutarejesha soka la kuvutia na la kushambulia, nguli wa klabu hiyo, Jamie Carragher, amewatahadharisha Liverpool na Iraola dhidi ya kile alichokiita "uamuzi wa hatari."
Katika safu yake kwenye gazeti la Telegraph, Carragher aliandika:
"Sifa kuu za kumfundisha mmoja wa vilabu bora zaidi barani Ulaya zinapaswa kutokana na kile ambacho mgombea ameshinda, katika ngazi gani, na kwa mtindo gani wa uchezaji. Iraola anakidhi kigezo kimoja tu kati ya hivyo. Sababu kubwa ya yeye kujiunga na Liverpool ni kwamba kikosi chake cha Bournemouth kilikuwa kikicheza kwa mtindo unaofanana na ule aliopenda Klopp.
Ni wazi pia jinsi sauti zote zinazotoka ndani ya klabu zinavyoonyesha hamu ya kupata mtu ambaye uongozi unamona yuko karibu zaidi na mtindo wa Mjerumani huyo (Klopp) kuliko wa Slot. Kila uteuzi wa kocha una hatari zake, lakini kupima makocha wajao wa Liverpool kulingana na jinsi wanavyofanana na mtindo wa 'heavy-metal football' ni jambo la hatari."
Carragher aliongeza kuwa kupunguza mafanikio makubwa ya Klopp kama kocha wa kiwango cha juu hadi kwenye kukaba kwa nguvu (high-pressing) na soka la kushambulia pekee, ni kupotosha ukweli wa kwa nini alikuwa kocha bora na kwa nini yeye na Liverpool walikuwa pacha waliokamilika.
