Mshambuliaji wa kimataifa wa England, Marcus Rashford, anaweza kujikuta akirejea Manchester United msimu ujao wa mashindano baada ya kupokea ujumbe wa matumaini kutoka kwa kocha mkuu wa klabu hiyo, Michael Carrick.
Mashetani Wekundu walimruhusu Rashford kuondoka Old Trafford msimu uliopita kwa mkopo wa msimu mzima kwenda Barcelona, baada ya kuwa kwa mkopo mwingine wa miezi sita katika klabu ya Aston Villa.
Rashford alifanya vizuri akiwa na miamba hiyo ya Catalan, akifunga mabao 14 na kutoa pasi za mabao (assists) 10 katika mechi 49 alizocheza kwenye mashindano yote. Hata hivyo, mapema wiki hii iliripotiwa kuwa miamba hiyo ya Hispania haitatumia kipengele cha kumnunua moja kwa moja kwa kiasi cha euro milioni 30.
Mtaalamu wa masuala ya usajili, Fabrizio Romano, aliandika kwenye ukurasa wake wa X (zamani Twitter):
"TAARIFA YA HARAKA: Barcelona HAITALIPA kipengele cha chaguo la kumnunua Marcus Rashford kwa euro milioni 30, ambacho kinamalizika muda wake ndani ya siku 5. Rashford anatarajiwa kurejea rasmi Man United lakini Barca wanaendelea kuwa wazi kutafuta suluhu nyingine, kama vile mkataba mwingine wa mkopo. Barca wako tayari kujadili upya iwapo Manchester United watafungua milango."
Chelsea na Bayern Munich Zikiwa Chonjo
Kufuatia sintofahamu hiyo, Chelsea imehusishwa na uwezekano wa kumsajili winga huyo kwa mkopo, wakati mwandishi wa habari wa gazeti la Bild, Christian Falk, akidai kuwa mchezaji huyo anaweza kuwa chaguo la Bayern Munich.
Romano alithibitisha uvumi huo kupitia chaneli yake ya YouTube, akifafanua kuwa ingawa Bayern walionyesha nia, kwa sasa kipaumbele chao kiko kwingine kutokana na gharama kubwa za mchezaji huyo.
"Kuna maswali mengi kuhusu nini kinaendelea kwa Rashford. Baadhi yenu mkaniuliza kama Bayern ni chaguo. Ninachofahamu ni kwamba kulikuwa na simu kutoka Bayern katika wiki mbili au tatu zilizopita kuulizia hali ya Marcus Rashford. Walikuwa wakiuliza tu kwa ujumla ikiwa anaweza kuwa chaguo, lakini kwa sasa Bayern wameelekeza nguvu zao kwa mchezaji wa aina tofauti. Kwa mfano, Saibari. Saibari ni mchezaji tofauti na Rashford kiufundi, lakini mshahara na gharama ya dili lake ni ndogo sana ukilinganisha na kile ambacho Bayern wangelazimika kulipa kumpata Rashford. Hivyo basi, hakuna mazungumzo rasmi au ofa iliyowasilishwa, na Bayern wanaangazia wachezaji wengine kwa sasa."
Carrick Amkaribisha Tena Old Trafford
Gazeti la The Sun sasa limeripoti kuwa kocha mkuu wa Man Utd, Michael Carrick, "amemfungulia mlango" Rashford ili arejee Old Trafford msimu huu wa joto na amekuwa akitawasiliana mara kwa mara na winga huyo mwenye umri wa miaka 28.
Rashford, ambaye hapo awali hakuwa na maelewano mazuri na kocha aliyepita, Ruben Amorim, ameripotiwa kupokea mrejesho mzuri baada ya kuzungumza na baadhi ya wachezaji viongozi wa kikosi cha kwanza kuhusu uwezekano wa yeye kurejea. Carrick pia ameweka wazi kuwa atafurahi kumkaribisha tena kikosini.
Maoni ya Nicky Butt Kuhusu Hatma ya Rashford
Kiungu wa zamani wa Man Utd, Nicky Butt, amewahi kueleza kuwa anaona kuna uwezekano mkubwa wa Rashford kujumuishwa tena kwenye kikosi cha miamba hiyo ya Manchester.
Butt alisema:
"Ni rahisi kusema kwamba maisha yake ndani ya Man United yameisha, lakini ukweli ni kwamba ana mkataba na mshahara wake ni mkubwa sana. Hawezi kuacha fedha hizo kirahisi, na pia haionekani kama kuna klabu iliyo tayari kumsajili kwa kiasi cha pesa ambacho United inahitaji. Anaweza kulazimika kurejea United, angalau kwa ajili ya mazoezi ya kujiandaa na msimu mpya. Nikimwangalia Michael Carrick, najua atakuwa tayari kumpokea mchezaji yeyote anayejiunga na kambi ya maandalizi. Yeye si mtu wa kuwatenga watu hivi hivi."
Butt aliongeza kuwa ikiwa Rashford atarejea kikosini na labda Carrick asipate wachezaji wote wapya anaowahitaji kwenye dirisha hili la usajili, basi itabidi amutumie kwani klabu haiwezi kumlipa mchezaji mshahara mkubwa kiasi hicho kisha kumuacha benchi hivi hivi.
Hali hii inampa Rashford nafasi nyingine adhimu ya kufufua makali yake kwenye klabu iliyomkuza tangu utotoni, chini ya kocha anayemjua vyema na anayeheshimika na wachezaji wengi klabuni hapo.
