Mshambuliaji wa kimataifa wa Italia na klabu ya Liverpool, Federico Chiesa, amefunguka kuwa yuko tayari kufungasha virago vyake na kuondoka Anfield ikiwa klabu hiyo haitampa uhakika wa kuanza katika kikosi cha kwanza msimu ujao.
Hatua hii inakuja huku kukiwa na mabadiliko makubwa ndani ya kikosi hicho cha Merseyside, ambacho hivi karibuni kilimtangaza Andoni Iraola kama kocha wao mpya baada ya kumfuta kazi Arne Slot. Slot alitimuliwa kufuatia msimu mbaya uliomalizika kwa Liverpool kukosa kombe lolote na kuambulia nafasi ya tano kwenye msimamo wa Ligi Kuu ya Uingereza.
Tayari klabu hiyo inajiandaa na maisha mapya bila nyota wao tegemeo kama Andy Robertson, Ibrahima Konate, na mfalme wao wa mabao, Mohamed Salah, ambao wote wanatarajiwa kucheza kwenye klabu mpya msimu ujao. Sasa, Chiesa naye ameongeza presha kwa uongozi wa majogoo hao wa jiji kwa kutishia kuondoka.
Akizungumza kwenye mahojiano ya kina na gazeti maarufu la michezo la nchini Italia, Gazzetta dello Sport, Chiesa alieleza masikitiko yake kuhusu kukosa nafasi ya kucheza tangu kuanza kwa mwaka huu wa 2026.
"Nimecheza kwa uchache sana tangu kuanza kwa mwaka 2026. Nina uhusiano mzuri sana na Liverpool. Mwezi Januari, klabu na Slot waliniambia siwezi kuondoka kwa sababu walinihitaji, hasa kutokana na uchache wa wachezaji kikosini. Tulikuwa kwenye wakati mgumu. Nilielewa hali hiyo na nikabaki nikitabasamu. Liverpool ni klabu kubwa inayozungumziwa kila wakati, na msimu uliopita walinisaidia kutwaa Ligi Kuu."
Hata hivyo, mshambuliaji huyo wa zamani wa Juventus amesisitiza kuwa kipaumbele chake kikubwa kwa sasa ni kucheza soka la ushindani mara kwa mara ili kulinda kiwango chake.
"Nasisitiza... nataka kucheza. Kama sitapata nafasi ya kucheza mfululizo hapa kwenye Ligi Kuu, itabidi nitafute fursa nyingine kwingineko. Karibu msimu wangu wote wa kwanza hapa Liverpool sikupata nafasi, na msimu uliopita pia nimecheza kidogo sana. Nitaenda kwenye kambi ya mazoezi nchini Marekani, kisha nitazungumza na klabu pamoja na kocha mpya, Iraola, na hapo ndipo tutakapoona mwelekeo wetu."
"Niko tayari kwa maamuzi yoyote, jambo la muhimu kwangu ni kucheza. Sina kiburi cha kusema lazima nianze kila mechi. Niko tayari kupigania namba yangu mahali popote pale."
Dili la Curtis Jones Kwenda Inter Milan Liko Wazi
Wakati suala la Chiesa likizua taharuki, kiungo mzawa wa Liverpool, Curtis Jones, naye yuko njiani kuondoka Anfield. Jones amekuwa akihusishwa kwa karibu na mabingwa wa Italia, Inter Milan, baada ya kukosa namba ya kudumu chini ya utawala wa Arne Slot.
Mtaalamu wa masuala ya usajili wa wachezaji barani Ulaya, Fabrizio Romano, amethibitisha kuwa mazungumzo kati ya Liverpool na Inter Milan yanaendelea vizuri, ingawa bado kuna utofauti wa thamani ya mchezaji huyo kati ya klabu hizo mbili.
Kulingana na Romano, Inter Milan tayari wameanza mazungumzo wakitaka kutoa dau la euro milioni 20 (takriban pauni milioni 17.3), wakati Liverpool wakitaka kiasi kisichopungua euro milioni 30 (takriban pauni milioni 25.9) huku wakitaka kuweka na vipengele vya ziada ikiwemo asilimia ya mauzo ya mchezaji huyo hapo baadaye (sell-on clause).
Romano alisema:
"Inter wana nia thabiti ya kumsajili Curtis Jones na mazungumzo na Liverpool yanaendelea. Ofa ya kuanzia ya Inter ni karibu euro milioni 20, lakini Liverpool wanataka zaidi ya euro milioni 30, labda ikiwemo na vipengele vya mauzo ya mbeleni na marupurupu mengine. Hivyo bado kuna utofauti wa viwango vya bei, lakini dili hili linaendelea na lina nafasi kubwa ya kukamilika. Jones mwenyewe anatamani uhamisho huo, na tayari ameshamuuliza Chiesa kuhusu maisha ya nchini Italia."
Mabadiliko haya ya haraka ndani ya Liverpool yanampa mtihani mzito kocha mpya Andoni Iraola, ambaye sasa analazimika kuanza ujenzi mpya wa kikosi hicho kinachokabiliwa na kupoteza nguzo zake muhimu kabla msimu mpya wa ligi haujaanza. Mashabiki wa Liverpool duniani kote, ikiwemo hapa nchini Tanzania, wanasubiri kwa hamu kuona jinsi uongozi wa klabu hiyo utakavyoziba mapengo hayo.
