Kiungo wa Liverpool, Curtis Jones, anaripotiwa kuwa karibu kabisa kuachana na klabu hiyo ya Anfield baada ya 'kukubali kwa mikono miwili' kujiunga na mabingwa wa Italia, Inter Milan.
Jones, ambaye amekulia kwenye akademia ya Liverpool na kupanda hadi kikosi cha kwanza, amekakuwa akihusishwa na kuondoka kwenye klabu ya utotoni mwake kwa kipindi cha mwaka mmoja uliopita. Hali hii inatokana na kutopata nafasi ya kutosha chini ya aliyekuwa kocha mkuu wa majogoo hao, Arne Slot, jambo lililovutia macho ya klabu kadhaa za Ulaya na Ligi Kuu ya Uingereza (EPL).
Ingawa kuondoka kwa Slot na kuwasili kwa kocha mpya Andoni Iraola kungeleta matumaini ya mwanzo mpya Anfield, uwezekano mkubwa kwa sasa ni yeye kufungasha virago msimu huu wa kiangazi.
Ushauri wa Chiesa na Maisha ya Italia
Katika kile kinachoonekana kuharakisha maamuzi yake, mchezaji mwenzake wa Liverpool, Federico Chiesa, amefichua kuwa alimshauri kiungo huyo wa kati kufikiria kwa uzito ofa ya kujiunga na Inter Milan. Chiesa, ambaye ana uzoefu mkubwa na soka la Serie A, alisema:
"Jones aliniuliza maisha ya kuishi Italia yapoje. Nilimwambia ni ya kushangaza na hali ya hewa ni nzuri zaidi kuliko kule Liverpool. Curtis ana ufundi mkubwa wa soka, na Inter wapo sahihi kabisa kumfikiria."
Kuhusu hatma yake mwenyewe ndani ya Liverpool, Chiesa aliongeza kuwa naye anatafuta nafasi ya kucheza mara kwa mara:
"Nataka kucheza kila mara. Nisipopata mwendelezo mzuri wa kucheza kwenye Ligi Kuu, itabidi nitazame kwingine. Mwaka wangu wa kwanza Liverpool karibu sikupata nafasi kabisa ya kucheza... nitajiunga na ziara ya maandalizi ya msimu mpya nchini Marekani, kisha nitazungumza na klabu pamoja na kocha mpya Iraola kuona nini kitatokea."
Jones Azitolea Nje Aston Villa na Newcastle
Ripoti mpya kutoka TEAMtalk zinaeleza kuwa Jones ameshafanya maamuzi na "amejitolea kujiunga" na Inter Milan, huku akiwa ameshashawishika kusema "ndio" kwa vigogo hao wa Serie A.
Habari hizo zinadai kuwa Jones amefikia hatua ya kukataa ofa kutoka kwa Aston Villa, huku pia akizipotezea klabu za Newcastle United na Nottingham Forest ambazo zilikuwa zikimnyatizia saini yake. Inaonekana mradi wa Inter Milan na fursa ya kucheza Ligi ya Mabingwa Ulaya chini ya Simone Inzaghi umemvutia zaidi kiungo huyo mwenye umri wa miaka 25.
Dau la Usajili na Mvutano wa Kifedha
Kuhusu makubaliano ya kifedha kati ya klabu hizo mbili, ripoti zinadai kuwa Inter Milan wamewasilisha ofa ya kwanza ya karibu euro milioni 25 (pauni milioni 21). Hata hivyo, Liverpool bado wanakomaa wakitaka kiasi kisichopungua euro milioni 30 (pauni milioni 25) wakiamini hiyo ndiyo thamani halisi ya Jones kutokana na ubora na uzoefu wake.
Msimamo wa Inter Milan wa kutotaka kutoa pesa nyingi unaongozwa na ukweli kwamba Jones anaingia kwenye mwaka wake wa mwisho wa mkataba na miamba hiyo ya Merseyside.
Fabrizio Romano Athibitisha: "Dili Lipo Moto"
Mtaalamu wa masuala ya usajili barani Ulaya, Fabrizio Romano, amethibitisha kuwa mazungumzo kati ya klabu hizo mbili yanaendelea vizuri na dili hilo bado lipo hai. Akizungumza kupitia chaneli yake ya YouTube, Romano alisema:
"Inter wanavutiwa sana na Curtis Jones. Tayari wapo kwenye mazungumzo na Liverpool. Inter wanaanzia kutoa ofa ya karibu euro milioni 20, wakati Liverpool wakitaka zaidi ya euro milioni 30, labda ikijumuisha kipengele cha kupata asilimia ya mauzo ya baadaye na marupurupu (bonuses). Kwa hiyo bado kuna pengo kubwa kati ya Inter na Liverpool, lakini dili hili bado lipo hai."
Romano aliongeza kuwa Jones mwenyewe ana hamu kubwa ya kukamilisha uhamisho huo, jambo linalofanya Inter kuwa na nguvu kubwa kwenye meza ya mazungumzo.
Huku maandalizi ya msimu mpya yakikaribia kuanza, mashabiki wa Liverpool wanasubiri kuona kama kocha Andoni Iraola atafanya jaribio la mwisho kumshawishi kijana huyo abaki, au kama miamba hiyo ya Anfield itakubali kumwachia aende akatafute changamoto mpya nchini Italia.
