Vita ya Viungo: Rice na Anderson vs Mainoo
Kuelekea fainali za Kombe la Dunia, kiungo nyota wa Arsenal, Declan Rice, ameteuliwa kuwa makamu nahodha wa timu ya taifa ya Uingereza (Three Lions). Chini ya kocha mkuu Thomas Tuchel, Rice anatarajiwa kuanza katika safu ya kiungo akishirikiana na Elliot Anderson wa Nottingham Forest, ambaye amekuwa na msimu mzuri.
Hata hivyo, macho ya wengi yapo kwa chipukizi wa Manchester United, Kobbie Mainoo, ambaye amejumuishwa kikosini baada ya kuonyesha kiwango kikubwa mwishoni mwa msimu wa 2025/26. Mainoo atakuwa akianzia benchi, akisubiri nafasi ya kuleta ushindani kwa Rice na Anderson.
Ripoti mpya kutoka nchini Uingereza zinafichua kuwa, Declan Rice amekuwa akijiuliza na hata kutilia shaka uwezo wa Mainoo katika eneo fulani la mchezo wake.
Shaka Kuhusu Uwezo wa Mainoo Bila Mpira
Mwandishi Samuel Luckhurst wa gazeti la The Sun ameripoti kuwa Rice ana mashaka na ufanisi wa mchezaji huyo wa Manchester United anapokuwa hana mpira.
"Mainoo amekuwa akikosolewa mara kwa mara kwa makosa ya kiulinzi, na kiungo wa England Declan Rice anaaminika kuwa na mashaka na mchango wake anapokuwa hana mpira."
Hata hivyo, taarifa hizi zinatakiwa kupokelewa kwa tahadhari. Ripoti nyingine kutoka chanzo cha karibu na wachezaji hao inadai kuwa Rice alikuwa akijiuliza kwa miezi mitatu iliyopita kama kweli Mainoo angejumuishwa kwenye kikosi cha Thomas Tuchel kufuatia mabadiliko makubwa ya kiwango chake chini ya Michael Carrick pale Manchester United.
"Declan Rice hakuweza kujizuia kujiuliza mwenzake wa England Kobbie Mainoo amekuwa wapi. Chanzo kimoja kilisema Rice alikuwa akitafakari miezi mitatu iliyopita kama Mainoo angeingia kwenye kikosi cha Kombe la Dunia cha Thomas Tuchel pale alipoanza kucheza mara kwa mara United chini ya Michael Carrick."
Mainoo amefanikiwa kuimarika kutoka hatua ya karibu kuondoka Old Trafford hadi kuwa mchezaji tegemeo chini ya kocha mpya Michael Carrick aliyerithi mikoba ya Ruben Amorim. Mchango wake uliisaidia United kufuzu Ligi ya Mabingwa Ulaya (Champions League), wakati Rice naye akiwa mmoja wa wagombea wa Tuzo ya Mchezaji Bora wa Msimu baada ya kutwaa ubingwa wa Ligi Kuu ya England na Arsenal.
Maumivu ya Kichwa kwa Tuchel Kwenye Mawinga
Kando na eneo la kiungo, kocha Thomas Tuchel anakabiliwa na mtihani mgumu wa kuchagua wachezaji katika nafasi nyingine, hasa mawinga. Nguli wa soka nchini Uingereza, Alan Shearer, ametoa ushauri kwa Tuchel kumweka benchi winga wa Arsenal, Noni Madueke, hata kama Bukayo Saka hatakuwa fiti kuanza.
Shearer, akizungumza kwenye kipindi cha 'The Rest is Football', alisema:
"Anayo nafasi ya kumchezesha Anthony Gordon au Marcus Rashford upande wa kulia, na mwingine upande wa kushoto, huku wote wakiwa pembeni ya Harry Kane. Hiyo ingeleta kasi, ukabaji wa kuanzia juu (pressing), na pia uwezo wa kurudi nyuma na kushambulia kwa kushtukiza, badala ya kumtumia Madueke. Pengine hilo ndilo chaguo ambalo ningeliangalia ikiwa Saka hatakuwa fiti kuanza mechi."
Kutemwa kwa Cole Palmer na Mtazamo wa Lampard
Mjadala mwingine mkubwa ni kuhusu kuachwa kwa Cole Palmer kwenye kikosi cha Kombe la Dunia. Frank Lampard, akizungumzia suala hilo, alionyesha upendo wake kwa staa huyo wa Chelsea na jinsi Tuchel anavyoweza kuwa anamchukulia.
Lampard alisema:
"Sijui anamwona wapi [Tuchel], kwa sababu amecheza zaidi kama namba 10 pale Chelsea. Kama anafikiri upande wa kulia anataka mchezaji mwenye kasi ya kupitiliza anayeweza kuwapita mabeki... Cole Palmer anaweza kuwapita wachezaji, bila shaka, kwa sababu anao uwezo huo, lakini ni mtindo tofauti wa mchezo, sivyo? Mimi ni shabiki mkubwa wa Cole Palmer. Na ninaamini katika mazingira haya, mchezo utapungua kasi kidogo na unaweza kuwa mgumu wakati mwingine, hasa kutokana na joto, na yeye ni mchezaji anayeweza kufanya mambo yatokee. Hakuna kinachomtia hofu, hana uoga kabisa."
Kwa sasa, mashabiki wa Uingereza na wapenzi wa soka nchini Tanzania wanasubiri kuona jinsi Tuchel atakavyopanga karata zake kuelekea mashindano hayo makubwa duniani.
