Mabadiliko makubwa yanaendelea kutokea ndani ya kikosi cha Liverpool chini ya kocha mpya Andoni Iraola. Ripoti za hivi punde zinaeleza kuwa kocha huyo Mhispania amefanya maamuzi thabiti kuhusu hatima ya kiungo mzawa Curtis Jones, ambaye anahusishwa kwa karibu na miamba ya Italia, Inter Milan. Hatua hii inakuja huku kukiwa na tetesi kuwa Liverpool inajiandaa kumsajili mchezaji anayetajwa kama 'photocopy' wa Jones kwa ajili ya kuziba pengo lake.
Jones mwenye umri wa miaka 25, ambaye amekulia katika academy ya Liverpool, ameichezea klabu hiyo ya utotoni jumla ya michezo 228 tangu alipopandishwa kikosi cha kwanza mwishoni mwa msimu wa 2019/2020. Katika kipindi hicho, amefanikiwa kufunga mabao 22 na kutoa pasi za mabao (assists) 25 kwa majogoo hao wa Merseyside.
Hata hivyo, kiungo huyo amekuwa akikosa nafasi ya kudumu katika kikosi cha kwanza cha miamba hiyo ya Anfield, jambo lililomfanya akose furaha, hasa chini ya kocha aliyepita Arne Slot. Jones alikuwa akihusishwa sana na kuhamia Inter Milan mwezi Januari, lakini Slot alizuia uhamisho huo kwa madai kuwa alikuwa na wachezaji 16 tu wa ndani (outfield players) wakati mabingwa hao wa Serie A walipowasilisha ofa yao.
Inter Milan Wapewa Mwanga wa Kijani Kusajili Jones
Mtaalamu wa masuala ya usajili, Fabrizio Romano, amefichua kuwa mazungumzo kati ya Inter Milan na Liverpool yanaendelea, ingawa bado kuna utofauti kidogo wa thamani ya mchezaji huyo kati ya klabu hizo mbili.
Kupitia chaneli yake ya YouTube, Romano alisema:
"Inter wana nia thabiti na Curtis Jones. Wanafanya mazungumzo na Liverpool. Inter wanaanzia dau la takriban euro milioni 20 [pauni milioni 17.3], wakati Liverpool wanataka zaidi ya euro milioni 30 [pauni milioni 25.9], labda pamoja na kuweka kipengele cha asilimia ya mauzo ya baadaye na marupurupu mengine."
Romano aliongeza kuwa Jones mwenyewe yuko tayari kwa changamoto hiyo mpya nchini Italia, na tayari ameshamuuliza mchezaji mwenzake Federico Chiesa kuhusu jinsi maisha yalivyo nchini humo.
Mkurugenzi wa Michezo wa Inter Milan, Piero Ausilio, pia amekiri wazi nia yao ya kumsajili mchezaji huyo kwa kusema:
"Tunamfuatilia kwa karibu Curtis Jones. Hatujaficha hili. Tunaelewa vizuri jinsi mambo yanavyoendelea."
Ingawa ilidhaniwa kuwa kuwasili kwa Iraola kungeweza kubadilisha upepo kwa Jones, gazeti maarufu la nchini Italia, Gazzetta dello Sport, linasisitiza kuwa kuwasili kwa kocha huyo Mhispania hakujabadilisha msimamo wa klabu hiyo, na Liverpool wako tayari kusikiliza ofa zinazoanzia pauni milioni 35.
Alex Scott Kuwa Mbadala wa Jones Anfield?
Sababu kubwa inayomfanya Jones asiwemo kwenye mipango ya Iraola ni nia ya kocha huyo kumleta mmoja wa wachezaji aliowahi kuwafundisha hapo awali – Alex Scott wa Bournemouth.
Scott, ambaye uchezaji wake unafanana sana na wa Jones (ndio maana anatajwa kama 'photocopy' yake), anatarajiwa kuwa nguzo mpya katika safu ya viungo ya Iraola. Ujio wa nyota huyo wa Bournemouth unaweza kumshusha zaidi Jones katika nafasi ya kupata namba kwenye kikosi cha kwanza, jambo linaloongeza hamu yake ya kutafuta changamoto mpya nje ya Uingereza.
Bournemouth wanaripotiwa kuhitaji dau lisilopungua pauni milioni 80 kwa ajili ya kumwachia Scott, ingawa Liverpool wao wanathamini kiungo huyo kwa takriban pauni milioni 60.
Alexis Mac Allister 'Kutolewa Kafara'?
Ili kufanikisha usajili wa wachezaji wapya na kuongeza nguvu ya kifedha kwenye bajeti ya usajili ya Iraola, Liverpool inaweza kulazimika kufanya maamuzi magumu zaidi. Kiungo wa kimataifa wa Argentina, Alexis Mac Allister, anatajwa kuwa mmoja wa wachezaji wanaoweza kuuzwa huku kukiwa na nia thabiti kutoka kwa miamba ya Hispania, Real Madrid.
Mwandishi wa habari za usajili, Pete O'Rourke, akizungumzia hali hiyo alisema:
"Liverpool inabidi ifanye biashara kwenye soko msimu huu ili kupata fedha za kuongeza bajeti yao ya usajili. Mac Allister ni mchezaji ambaye wanaweza kukubali kumuuza shingo upande. Bado ana thamani kubwa sokoni na ni bingwa wa Kombe la Dunia, hivyo kama atafanya vizuri tena kwenye michuano ya Kombe la Dunia mwezi huu, bila shaka atavutia klabu nyingine nyingi mezani."
Ingawa kwa sasa Liverpool wanatafuta kuimarisha kikosi chao badala ya kukidhoofisha, kama watasukumizwa kufanya mauzo ili kupata fedha za usajili, Mac Allister anaweza kuwa mmoja wa wachezaji watakaotolewa kafara msimu huu.
