Mtikisiko Bernabeu: Mourinho Ataka Valverde Auazwe
Kurejea kwa kocha mwenye ushawishi mkubwa duniani, Jose Mourinho, katika klabu ya Real Madrid kumeanza kuleta mtikisiko mkubwa baada ya kuripotiwa kuwa ameuomba uongozi wa klabu hiyo kumuuza kiungo wa kimataifa wa Uruguay, Federico Valverde, kwenye dirisha hili la usajili la kiangazi.
Mourinho, ambaye amerejea Santiago Bernabeu kwa awamu ya pili kukinoa kikosi hicho, anasemekana kutoridhishwa kabisa na taarifa za kinidhamu za kiungo huyo mchapakazi, licha ya mchango wake mkubwa katika miaka ya hivi karibuni.
Usajili wa Nguvu na Mabadiliko ya Kikosi
Real Madrid imekuwa na mwanzo mzuri na wenye shughuli nyingi kwenye soko la usajili wa kiangazi, ikiwa tayari imeshakamilisha dili za wachezaji wanne wakubwa. Beki wa kushoto Marc Cucurella amejiunga akitokea Chelsea, huku Bernardo Silva akitua Madrid kama mchezaji huru baada ya mkataba wake na Manchester City kumalizika.
Aidha, beki wa kati Ibrahima Konate naye amejiunga na klabu hiyo bure baada ya kuondoka Liverpool, wakati mabingwa hao wa Ulaya wakiwa tayari wamefikia makubaliano na Inter Milan kwa ajili ya saini ya beki wa kulia Denzel Dumfries.
Kwa upande wa wachezaji wanaondoka, Dani Ceballos anatajwa kuwa hayumo kwenye mipango ya baadaye ya klabu hiyo, huku walinzi wakongwe David Alaba na Dani Carvajal wakiwa tayari wameshaondoka baada ya mikataba yao kufikia kikomo.
Ripoti Mbaya za Nidhamu Zamuondoa Valverde Kwenye Ramani
Hata hivyo, taarifa za kuuzwa kwa Federico Valverde zimekuja kama mshtuko kwa mashabiki wengi. Kwa mujibu wa mwandishi wa habari Ignacio Sanchez, Mourinho ameuambia uongozi kufanya kila linalowezekana ili kumtoa kiungo huyo klabuni hapo.
Inaelezwa kuwa uamuzi wa Mourinho umetokana na ripoti mbaya alizozipokea kuhusu tabia ya Valverde ndani ya chumba cha kubadilishia nguo msimu uliopita, ikiwa ni pamoja na ugomvi mkubwa wa mazoezini kati yake na kiungo mwenzake, Aurelien Tchouameni.
Ingawa wachezaji hao wawili walimaliza tofauti zao baadaye, uvumi wa mmoja wao au wote wawili kuuzwa uliendelea kushika kasi. Sanchez alifichua kupitia ukurasa wake wa mtandao wa X (zamani Twitter) kuwa tabia ya Valverde ilikuwa mbaya kiasi cha kuwakera wachezaji wenzake na benchi la ufundi lililokuwa chini ya Xabi Alonso.
Sanchez aliandika:
'Taarifa Maalum. Alikuwa na tabia ya dharau kwa kocha (Xabi Alonso) na mchezaji asiyeshirikiana vizuri na wenzake msimu uliopita, kiasi kwamba asilimia kubwa ya wachezaji kwenye kikosi hawataki awe sehemu ya timu watakaporejea mazoezini. Tukio la mwisho na Tchouameni lilikuwa la kuudhi sana na lawama zote zilimwangukia yeye.'
Kufuatia ripoti hizi, Mourinho ameweka wazi kuwa hataki kuona nidhamu mbovu inaharibu mshikamano wa timu yake mpya na hivyo ametaka mchezaji huyo auzwe haraka iwezekanavyo.
Rekodi na Hatma ya Valverde Madrid
Valverde, ambaye kwa sasa yuko na timu ya taifa ya Uruguay kwenye michuano ya Kombe la Dunia la mwaka 2026, ana mkataba na Real Madrid unaoenda hadi kiangazi cha mwaka 2029.
Tangu ajiunge na Los Blancos, kiungo huyo amekuwa mhimili muhimu akicheza michezo 372, akifunga mabao 41 na kutoa pasi za mabao (assists) 44. Katika kipindi hicho, amefanikiwa kubeba mataji matatu ya La Liga na mataji mawili ya Ligi ya Mabingwa Ulaya (UEFA Champions League).
Licha ya mafanikio hayo makubwa ya kihistoria, inaonekana safari ya mchezaji huyo inaweza kufikia kikomo mapema chini ya utawala mpya wa Jose 'The Special One' Mourinho.
