Licha ya kuwepo kwa maneno chini kwa chini kuwa huenda akabadili mawazo, klabu ya Liverpool imesisitiza kuwa haina mpango wa kubadili uamuzi wao kuhusu mustakabali wa nguli wao, Mohamed Salah, ambaye anatarajiwa kuondoka klabuni hapo mwishoni mwa msimu.
Mwezi Machi mwaka huu, Majogoo hao wa Merseyside walitangaza rasmi kuwa mshambuliaji huyo wa kimataifa wa Misri ataondoka Anfield mwishoni mwa msimu wa 2025-26. Hatua hiyo ilichukuliwa mapema ili kutoa nafasi kwa mashabiki wa klabu hiyo kumuaga vizuri mchezaji huyo anayetazamwa kama nguzo na gwiji wa klabu.
Katika taarifa rasmi iliyotolewa na Liverpool wakati huo, klabu ilisema:
"Mohamed Salah anahitimisha safari yake ya mafanikio makubwa ndani ya Liverpool FC mwishoni mwa msimu wa 2025-26. Mshambuliaji huyo amefikia makubaliano na Majogoo hao yatakayohitimisha sura yake ya miaka tisa ya kihistoria pale Anfield. Salah alionyesha nia ya kutaka tangazo hili liwafikie mashabiki mapema iwezekanavyo ili kuweka uwazi kuhusu mustakabali wake, kutokana na heshima na shukrani alizonazo kwao."
Kauli ya El-Shenawy na Majibu Makali ya Wakala wa Salah
Hata hivyo, hivi karibuni kuliibuka matumaini mapya kwa baadhi ya mashabiki baada ya kipa wa timu ya taifa ya Misri na mchezaji mwenzake wa Salah, Ahmed El-Shenawy, kudai kuwa nyota huyo anaweza kusalia Anfield.
Akizungumza na kituo cha televisheni cha ON Time Sports, El-Shenawy alisema:
"Wazo la kuondoka Liverpool limemuathiri kisaikolojia Mo, lakini hali inaweza kubadilika na bado akaendelea kubaki na timu hiyo. Hata aliniambia kuwa bado hajui lolote kuhusu maisha yake ya baadaye."
Kauli hiyo haikumfurahisha wakala wa Salah, Ramy Abbas Issa, ambaye alitumia ukurasa wake wa mtandao wa kijamii wa X (zamani Twitter) kuzima uvumi huo haraka sana. Abbas alisisitiza kuwa masuala ya mustakabali wa Salah ni ya siri kubwa na hayajadiliwi na watu wasiohusika.
"Mohamed yuko sawa kabisa, na mimi wala yeye hatupendelei kujadili mipango nyeti ya baadaye na watu ambao hawahusiki nayo. Sote wawili ni wasiri sana kuhusu mambo haya. Ndiyo, watu wanaweza kuuliza na kupata majibu ya adabu ya kawaida, lakini ni hayo tu," alisema Abbas.
Liverpool Haina Mpango wa Kubadili Maamuzi
Mwandishi wa habari za michezo anayeaminika, Ben Jacobs, amethibitisha kuwa Liverpool hawana mpango kabisa wa kumpatia Salah mkataba mpya au kumzuia kuondoka, licha ya maneno ya El-Shenawy.
Kupitia ukurasa wake wa X, Jacobs alieleza kuwa Liverpool wataheshimu makubaliano ya awali ya kuachana na mchezaji huyo. Katika taarifa hiyo, Jacobs pia aligusia mustakabali wa Cody Gakpo, akisema mshambuliaji huyo wa Kiholanzi hajaiambia klabu kuwa anataka kuondoka, ingawa ananyemelewa na klabu za Italia na Bayern Munich. Liverpool hawana haraka ya kumuuza Gakpo, ambaye mkataba wake unafikia hadi mwaka 2030, na thamani yake itapimwa kwa kuangalia dili la pauni milioni 70 la Anthony Gordon kwenda Barcelona.
Kuhusu mfalme huyo wa Misri, Jacobs aliandika kwa kifupi lakini kwa msisitizo:
"Liverpool pia hawana mipango ya kumbakiza Mo Salah licha ya maoni ya kipa wa Misri, Ahmed El-Shenawy kwamba 'mambo yanaweza kubadilika'."
Je, Uturuki Ndiyo Kituo Kinachofuata kwa Salah?
Wakati mlango wa kubaki Anfield ukiwa umefungwa, tetesi mpya zimeanza kushika kasi zikimhusisha Salah na miamba ya soka ya Uturuki, Fenerbahce.
Mkurugenzi wa zamani wa ufundi wa klabu hiyo chini ya utawala uliopita, Ertan Torunogullari, amefichua kuwa Salah alikuwa na nia kubwa ya kujiunga nao baada ya kufanya mazungumzo chanya.
Torunogullari alikaririwa akisema:
"Alikuwa na shauku kubwa ya kuja Uturuki. Mazungumzo tuliyofanya naye yalikuwa chanya sana. Tulikuwa tumekubaliana katika mambo mengi, ikiwa ni pamoja na mshahara wake. Kama uongozi mpya utafanya ombi hilo, ninaamini Salah atavaa uzi wa Fenerbahce. Tutafanya kazi kwa furaha na uongozi mpya kwenye mazungumzo haya."
Kauli hii inakuja baada ya rais mpya wa Fenerbahce, Aziz Yildrim, kudai kuwa ana uwezo wa kumleta Salah nchini Uturuki ikiwa angeshinda uchaguzi wa klabu hiyo. Kwa sasa, macho yote ya wapenzi wa soka duniani na hususan mashabiki wa Liverpool yapo kwa Salah kuona wapi atakapoenda kuandika ukurasa mpya wa maisha yake ya soka baada ya miaka tisa ya kihistoria pale Merseyside.
