Mabingwa wa kihistoria wa Ligi Kuu ya England, Manchester United, wameingia kwenye rada za kumsajili beki mahiri wa kushoto wa Newcastle United, Lewis Hall, msimu huu wa joto huku wakipanga pia kuongeza nguvu kwenye safu yao ya ushambuliaji.
Katika kile kinachoonekana kama mapinduzi makubwa ndani ya uwanja wa Old Trafford chini ya usimamizi wa kampuni ya INEOS, vipaumbele vya usajili vimeanza kuwekwa wazi. Baada ya kuelekeza nguvu zao kwenye kuimarisha eneo la kiungo ambapo Matheus Fernandes anatajwa kuwa njiani kujiunga na miamba hiyo akitokea kuwa usajili wa pili baada ya Ederson Silva, sasa macho yote yamehamishiwa kwenye ulinzi wa kushoto na ushambuliaji.
Ripoti mbalimbali zinaashiria kuwa Mashetani Wekundu wanaweza kukamilisha usajili wa wachezaji wengine watano baada ya kukamilika kwa dili la Fernandes, huku nafasi ya beki wa kushoto ikipewa kipaumbele kikubwa kumpatia ushindani Luke Shaw.
Lewis Hall Ndiye Jibu la Kudumu la Luke Shaw?
Kocha wa Manchester United, Michael Carrick, anahitaji mbadala wa uhakika wa Luke Shaw ambaye amekuwa akikabiliwa na changamoto za majeraha ya mara kwa mara, hali inayomfanya asiaminike kubeba majukumu ya msimu mzima peke yake, hasa msimu huu ambapo klabu hiyo inashiriki mashindano mengi.
Lewis Hall wa Newcastle anatajwa kuwa ndiye mchezaji anayependelewa zaidi na uongozi wa United kwa ajili ya eneo hilo. Licha ya ripoti za awali kudai kuwa mchezaji huyo asingeweza kuondoka St James' Park, mwandishi wa habari za uchambuzi wa Manchester United, Tyrone Marshall, anaamini dili hilo linawezekana kabisa.
"Kwa sasa, kipaumbele cha United kipo kwenye nafasi ya beki wa kushoto badala ya winga wa kushoto. United inavutiwa sana na Lewis Hall na dili hili linaweza kukamilika, huku lengo kuu likiwa ni kupata mrithi wa muda mrefu wa Shaw," alisema Marshall wakati akijibu maswali ya mashabiki kupitia jarida la Manchester Evening News.
Marshall pia alifafanua kuwa mchezaji mwingine anayehusishwa na eneo hilo, Patrick Dorgu, kwa sasa anachukuliwa zaidi kama winga na si beki, jambo linalofanya uwezekano wa yeye kujiunga na klabu hiyo kuwa mdogo kwa sasa. Pia, nia ya kuwasajili Morgan Rogers na Iliman Ndiaye ipo, lakini dili zao zitategemea urari wa kifedha na si vipaumbele vya kwanza vya klabu msimu huu.
Hatima ya Sandro Tonali na Hali ya Kifedha ya Newcastle
Kuhusu tetesi za kiungo wa Kiitaliano, Sandro Tonali, kuhusishwa na Manchester United, mambo yanaonekana kupoa. United wameripotiwa kujiondoa kwenye mbio za kuwania saini ya kiungo huyo pamoja na nyota mwingine, Anderson.
Newcastle United hawana shinikizo la kuuza wachezaji wao msimu huu baada ya kujihakikishia kitita cha pauni milioni 69 kutokana na mauzo ya winga wao Anthony Gordon. Kutokana na hali hiyo, Manchester United wataelekeza nguvu zao zaidi kwa Lewis Hall badala ya Tonali, kwani hakuna uwezekano wa kuwapata wachezaji hao wawili kwa mpigo.
Mshambuliaji Mpya Anukia Kusaidiana na Benjamin Sesko
Eneo lingine ambalo Michael Carrick anataka kulifanyia kazi haraka ni safu ya ushambuliaji. United inapanga kuongeza mshambuliaji mzoefu wa ziada, hususan kama Joshua Zirkzee ataondoka klabuni hapo msimu huu. Mshambuliaji huyu mpya atakuja kama msaidizi (backup) wa Benjamin Sesko.
Licha ya Robert Lewandowski anayeondoka Barcelona kuhusishwa na klabu hiyo, mshambuliaji huyo mwenye umri wa miaka 37 anatarajiwa kuelekea nchini Marekani kujiunga na klabu ya Chicago Fire inayoshiriki ligi ya MLS, huku Tyrone Marshall akieleza kwanini Lewandowski hakuwa chaguo sahihi kwa United.
"Sioni hili likitokea. United inataka mshambuliaji mzoefu wa kusaidiana na Sesko, lakini anapaswa kuwa mchezaji mwenye wasifu wa chini (low profile) kuliko Lewandowski. Lewandowski bado anahitaji mshahara mkubwa sana na kwa hadhi yake, atatarajia kuanza mbele ya Mslovenia huyo (Sesko)."
"Ni mchezaji mzuri sana na takwimu zake za msimu uliopita zilikuwa bora, lakini akiwa na umri wa miaka 37, haendani kabisa na mfumo wa ujenzi wa kikosi cha United au mtindo wa mchezo anaotaka kocha Michael Carrick," alihitimisha Marshall.
Mipango hii ya INEOS inaonyesha wazi kuwa wanataka kujenga kikosi chenye usawa wa wachezaji vijana wenye vipaji vya muda mrefu kama Lewis Hall, huku wakiongeza uzoefu wa gharama nafuu kwenye maeneo yenye mapungufu ili kuleta ushindani wa kweli kwenye Ligi Kuu ya England.
