Hatua ya Dakika za Mwisho Baada ya Hofu Kutanda
Zikiwa zimesalia siku 10 tu kabla ya mchezo wao wa kwanza wa Kombe la Dunia mjini Los Angeles, wachezaji wa timu ya taifa ya Iran hatimaye wamepewa visa za kuingia nchini Marekani. Hatua hii inakuja katikati ya mzozo mkali wa kisiasa na kijeshi unaoendelea kati ya nchi hizo mbili.
Afisa mmoja wa Ikulu ya Marekani (White House) amethibitisha kuwa visa hizo zilitolewa usiku wa kuamkia Ijumaa, baada ya Balozi wa Iran nchini Mexico, Abolfazl Pasandideh, kulalamika Alhamisi jioni kuwa kikosi hicho kilikuwa bado hakijapokea vibali hivyo vya kusafiri.
Kambi Kuhamishiwa Mexico kwa Dharura
Kutokana na mivutano hiyo na ucheleweshaji wa visa, Serikali ya Tehran ilifanya maamuzi ya dharura ya kuhamisha kambi ya maandalizi ya timu hiyo. Awali, timu hiyo ilipangwa kuweka kambi katika jimbo la Arizona nchini Marekani, lakini sasa kambi hiyo imehamishiwa mji wa Tijuana nchini Mexico.
Uamuzi huu pia umechangiwa na mtazamo unaokua nchini Iran kwamba uwepo wa kikosi chao nchini Marekani unapaswa kuwa wa kiwango cha chini kabisa ili kuepusha usumbufu au mivutano zaidi ya kisiasa. Kikosi cha Iran kinatarajiwa kutua Tijuana mapema Jumapili asubuhi kuanza maandalizi ya mwisho.
Ratiba ya Iran Kwenye Kundi G
Iran ipo katika Kundi G la michuano hiyo mikubwa zaidi ya soka duniani. Ratiba yao inatarajiwa kuwa kama ifuatavyo:
- Juni 15: Iran dhidi ya New Zealand (Los Angeles)
- Mchezo wa Pili: Iran dhidi ya Ubelgiji (Los Angeles)
- Mchezo wa Tatu: Iran dhidi ya Misri (Seattle)
Mvutano wa sasa wa kijeshi kati ya Marekani na Iran umegeuza michuano hii kuwa uwanja wa mapambano ya kisiasa, huku pande zote mbili zikitumia fursa hii kujitangaza au kuonyesha misimamo yao ya kijiografia. Hii ni mara ya kwanza katika historia ya Kombe la Dunia tanzu kuanzishwa kwake mwaka 1930, kwa nchi mwenyeji kupokea timu ya taifa kutoka nchi ambayo ipo vitani nayo.
Vikwazo vya Usafiri na Suala la Wanajeshi
Ingawa serikali ya Marekani haijawahi kutangaza rasmi kuwa haitaki timu ya Iran iingie katika ardhi yake, kumekuwa na vikwazo vikali vya usalama. Waziri wa Mambo ya Nje wa Marekani, Marco Rubio, aliwaambia wabunge mapema wiki hii kuwa Marekani haitakubali mtu yeyote aliye na uhusiano na Kikosi cha Walinzi wa Mapinduzi ya Kiislamu (IRGC) — ambacho ni tawi lenye nguvu la jeshi la Iran — kuwa sehemu ya msafara wa timu hiyo.
Sheria hii inaweza kuathiri baadhi ya wachezaji wa Iran ambao walilazimika kupitia mafunzo ya kijeshi ya lazima chini ya kikosi hicho cha IRGC. Athari za msimamo huu tayari zilijitokeza mwezi Desemba mwaka jana, ambapo Rais wa Shirikisho la Soka la Iran, Mehdi Taj, alinyimwa visa ya kuingia Washington kuhudhuria droo ya makundi ya Kombe la Dunia kwa kuwa yeye ni kamanda wa zamani wa IRGC.
Soka Kama Jukwaa la Amani?
Licha ya changamoto hizi zote, upande wa Iran unaamini kuwa kushiriki kwao katika michuano hii kuna ujumbe mkubwa wa amani. Balozi Pasandideh, akizungumza kutoka ubalozi wa Iran mjini Mexico City kupitia mtafsiri wa lugha ya Kihispania, alisema:
"Kushiriki kwa Iran katika Kombe la Dunia — hata katika ardhi ya nchi inayochukuliwa kuwa adui yake — kunaonyesha kuwa Iran inatafuta amani."
Hata hivyo, maendeleo ya mazungumzo ya amani kati ya Washington na Tehran yamekuwa yakienda taratibu sana, huku pande zote mbili zikiendelea kushambuliana kijeshi mara kwa mara hata wakati huu wakijaribu kutafuta suluhu ya muda.
