Wingu Jeusi Kambi ya Three Lions
Maandalizi ya timu ya taifa ya England (Three Lions) kuelekea mchezo wao wa kwanza wa makundi wa Kombe la Dunia dhidi ya Croatia yamegubikwa na majeraha, baada ya beki wa pembeni wa Newcastle United, Tino Livramento, kuondolewa rasmi kwenye mashindano hayo.
Kikosi hicho kinachonolewa na kocha Thomas Tuchel kilikuwa kikikamilisha maandalizi yake ya mwisho kabla ya kuvaana na Croatia siku ya Jumatano usiku katika mchezo wa Kundi L, lakini sasa kitalazimika kufanya hivyo bila huduma ya kijana huyo mwenye umri wa miaka 23.
Habari hizi ziliripotiwa kwa mara ya kwanza na mwandishi wa habari nguli wa gazeti la The Telegraph, Matt Law, aliyeeza kuwa Livramento amepata jeraha litakalomlazimisha kufunganya virago na kuondoka kambini kurejea nyumbani nchini Uingereza.
Ingawa Livramento hakuwa anapewa nafasi kubwa ya kuanza kwenye kikosi cha kwanza cha Tuchel, alikuwa mchezaji muhimu sana kwenye benchi kutokana na uwezo wake wa kipekee wa kucheza kama beki wa kulia na beki wa kushoto kwa ufanisi mkubwa.
Trevoh Chalobah Aitwa Kuziba Pengo
Baada ya pigo hilo la dakika za mwisho, Tuchel amelazimika kufanya maamuzi ya haraka ili kuziba nafasi hiyo. Chini ya sheria za FIFA, kocha anaruhusiwa kufanya mabadiliko ya mchezaji aliyeumia hadi saa 24 kabla ya mchezo wa kwanza wa timu yake.
Tuchel amemteua beki wa kati wa Chelsea, Trevoh Chalobah, kuwa mbadala wa Livramento. Taarifa hizi zilithibitishwa baadaye na mwandishi wa habari za michezo anayeaminika zaidi duniani, David Ornstein wa The Athletic.
Hata hivyo, tofauti na ripoti ya kwanza iliyodai kuwa Livramento ana tatizo la nyama za paja (hamstring), Ornstein alieleza kuwa mchezaji huyo amepata jeraha la misuli ya ndama (calf injury).
Kupitia ukurasa wake wa mtandao wa X (zamani Twitter), Ornstein aliandika:
"Tino Livramento kukosa Kombe la Dunia kutokana na jeraha la misuli ya ndama. Sio jeraha kubwa sana lakini ni pigo kubwa kwa beki huyo wa Newcastle United na England kuelekea mchezo wao wa kwanza wa Kombe la Dunia la FIFA 2026 dhidi ya Croatia. Kinda huyo mwenye miaka 23 anarejea NUFC na Trevoh Chalobah ameitwa kuziba nafasi yake."
Paul Parker Apigia Debe Lewis Hall
Uamuzi wa kumwita Trevoh Chalobah umeleta maswali kidogo miongoni mwa wachambuzi, huku wengine wakiona kuwa beki wa kushoto wa Newcastle United, Lewis Hall, alikuwa chaguo sahihi zaidi na la asili la kuziba nafasi ya Livramento.
Beki wa zamani wa Manchester United, Paul Parker, anaamini kuwa Hall alistahili kuwa sehemu ya kikosi hicho cha Tuchel tangu mwanzo na sio tu kama mchezaji wa dharura.
Akizungumzia uwezo wa Hall, Parker alisema:
"Lewis Hall ni beki wa kushoto mzuri sana. Sijawahi kumwona akizidiwa nguvu na mpinzani—ni mchezaji mwenye kupambana na mgumu sana. Pia ana kipaji kikubwa akiwa na mpira miguuni kwa sababu aliwahi kucheza nafasi ya kiungo wakati akiwa katika akademia ya Chelsea."
Parker aliongeza kuwa nidhamu ya mchezo ya Hall inamfanya kuwa bora zaidi kuliko wachezaji wengine chipukizi wanaopewa nafasi nchini England.
"Anajisikia huru kushambulia kama anavyokuwa makini kwenye kuzuia, na nadhani anapaswa kuwa chaguo la kwanza la Thomas Tuchel katika kikosi hiki cha England kwenye nafasi ya beki wa kushoto. Ukilinganisha na Miles Lewis-Skelly, nadhani kuna uwezekano mkubwa wa kupata nidhamu nzuri ya mchezo kutoka kwa Hall kwenye hiyo nafasi. Lewis-Skelly hapati nafasi ya kucheza mara kwa mara katika ngazi ya klabu ili Tuchel amchague kama chaguo lake la kwanza, jambo ambalo ni la kusikitisha kidogo."
Sasa macho yote yatakuwa kwa Thomas Tuchel kuona jinsi atakavyopanga karata zake dhidi ya Croatia huku akiwa na ingizo jipya la Trevoh Chalobah kikosini.
