Klabu ya Tottenham Hotspur imeripotiwa kuingia rasmi kwenye mbio za kuwania saini ya kiungo nyota wa Newcastle United, Sandro Tonali, katika dirisha hili la usajili la kiangazi. Hatua hii inakuja huku klabu hiyo ya kaskazini mwa London ikitaka kufanya mapinduzi makubwa kwenye kikosi chao baada ya msimu mbaya uliopita.
Spurs walinusurika kushuka daraja kwa tundu la sindano katika kampeni za msimu wa 2025/26, ambapo walijihakikishia kubaki Ligi Kuu ya Uingereza (Premier League) katika siku ya mwisho ya msimu. Kocha mkuu Roberto De Zerbi alipewa mkataba mnono katika wiki za mwisho za msimu kwa lengo la kuwaokoa Spurs, na alifanikiwa kufanya hivyo kwa kuipiku kwa mbinde West Ham katika vita hiyo ngumu ya kujinusuru.
Hata hivyo, kubaki Ligi Kuu hakufuti ukweli kwamba Spurs walikuwa na msimu mbovu na wa hovyo sana. Baada ya timu hiyo kubaki salama, De Zerbi aliweka wazi kuwa wanahitaji kufanya kazi kubwa na ya haraka katika dirisha hili la usajili ili kurudisha heshima ya timu hiyo. Inasemekana kuwa De Zerbi alipewa uhakika wa kupata sapoti kubwa ya usajili wakati anajiunga na timu hiyo, na sasa wanaonesha nia thabiti ya kufanya mabadiliko hayo makubwa kwa ajili ya msimu ujao.
Mpango wa Kibabe wa De Zerbi na Usajili Mpya
Spurs tayari wamekamilisha dili za kuwasajili Andy Robertson na Marcos Senesi kama wachezaji huru, huku pia wakihusishwa na jitihada za kuwanasa Savinho, Jan Paul van Hecke, pamoja na Joao Palhinha. Lakini sasa, klabu hiyo imeamua kufanya jaribio la kijasiri kwa kumsaka Tonali, ambaye amekuwa akihusishwa na klabu kubwa za 'Big Six' hivi karibuni.
Licha ya kuuza nyota wao Anthony Gordon, Newcastle bado wapo kwenye hatari ya kumpoteza Tonali kutokana na kushindwa kufuzu mashindano ya Ulaya kwa msimu ujao. Jambo hili linawapa nguvu wapinzani wao kujaribu kumng'oa kiungo huyo wa Kiitaliano ambaye amekuwa muhimili mkubwa katika idara ya kiungo.
Vita Imepamba Moto: Romano Afichua Siri
Mwandishi wa habari za usajili anayeaminika zaidi duniani, Fabrizio Romano, amefichua kuwa Tottenham sasa ni mshindani mwingine mkubwa katika mbio za kumsajili Tonali, wakichuana na miamba mingine ya Ligi Kuu kama vile Manchester City na Arsenal.
Kupitia ukurasa wake wa X, Romano aliandika:
"KIPEKEE: Tottenham imeingia kwenye mbio za kumsajili Sandro Tonali! De Zerbi anamtaka Tonali kama nyota mpya wa idara ya kiungo, mtu sahihi wa kupandisha kiwango cha Spurs. Spurs wako tayari kupambana na Man City na Arsenal katika mbio za kumpata Tonali kwa ajili ya mradi mpya wa kibabe ili kuonesha malengo yao."
Man United Yajitoa Kwenye Mbio
Wakili Spurs wakijitupa uwanjani kwa nguvu zote, upande wa Manchester United wao wameripotiwa kujiondoa rasmi kwenye mbio hizi za kuwania saini ya Tonali. Romano amebainisha kuwa Mashetani Wekundu hawatofanya jitihada zozote za kumsajili kiungo huyo katika dirisha hili, huku wakiamini kuwa thamani yake ni kubwa mno kwa sasa.
Romano akieleza hali hiyo kupitia chaneli yake ya YouTube amesema:
"Manchester United hawataenda kwa Sandro Tonali katika hatua hii. Nia ya Manchester United si kuendelea na dili hili. Manchester United wamekuwa wakivutiwa na Tonali kwa muda mrefu, na amekuwa kwenye orodha yao ya usajili, lakini kwa sasa wanaamini kuwa mchezaji huyo ni ghali sana."
Inafahamika kuwa baada ya United kukamilisha usajili wa Ederson, bado wanatafuta kiungo mwingine lakini wataelekeza nguvu zao kwingine badala ya Tonali. Hali hii inaiacha Tottenham ikijiandaa kupambana vikali na Arsenal pamoja na Manchester City katika kumsaka fundi huyo wa Newcastle ili kuimarisha kikosi chao kwa msimu mpya wa ligi.
