Mshambuliaji wa kimataifa wa Uruguay, Darwin Nunez, amegonga vichwa vya habari tena kufuatia ripoti zilizodai kuwa yuko mbioni kurejea katika klabu yake ya zamani ya Liverpool. Hata hivyo, mtaalamu wa habari za usajili wa soka duniani, Fabrizio Romano, ameingilia kati na kuweka wazi ukweli kuhusu madai hayo yanayosambaa kwa kasi.
Nunez, ambaye kwa sasa ana umri wa miaka 26, aliondoka Anfield msimu uliopita wa joto na kujiunga na miamba ya Ligi Kuu ya Saudi Arabia (Saudi Pro League), Al-Hilal, kwa dau la karibu pauni milioni 46. Licha ya kuondoka kwake, jina lake limeendelea kutajwa mara kwa mara huko Merseyside, na sasa tetesi mpya zimeibuka zikidai kuwa kila kitu kimekamilika kwa ajili ya safari yake ya kurudi Uingereza.
Chimbuko la Tetesi za Kurejea Liverpool
Suala la Nunez kurejea Liverpool lilipata nguvu kubwa baada ya mwandishi wa habari kutoka Uruguay, Juan Pablo Romero, kudai kuwa dili hilo limeshakamilika. Romero, akizungumza kupitia kipindi cha Carpe Deportiva, alisisitiza kuwa mshambuliaji huyo atavaa tena jezi nyekundu msimu ujao.
"Darwin Núñez anakwenda kuchezea Liverpool. Taarifa hizi hazitathibitishwa wakati wa Kombe la Dunia au katika siku chache zijazo, lakini kila kitu kimeshakamilika kwa ajili ya Darwin kurejea Liverpool na kuchezea timu hiyo msimu ujao."
Tetesi hizi zimekuja wakati muafaka ambapo Liverpool inakabiliwa na uhitaji wa mshambuliaji mpya. Hii ni kutokana na ukweli kwamba watamkosa nyota wao Hugo Ekitike kwa sehemu kubwa ya msimu wa 2026/27 kufuatia jeraha kubwa la tendon ya Achilles. Mazingira haya yaliwafanya mashabiki wengi wa Liverpool kuamini kuwa huenda kweli Nunez anarudi kuziba pengo hilo.
Fabrizio Romano Akata Mzizi wa Fitina
Licha ya msisitizo huo kutoka kwa waandishi wa Amerika Kusini, Fabrizio Romano ametoa taarifa tofauti kabisa. Romano ametumia kurasa zake za mitandao ya kijamii kupunguza joto la mashabiki kwa kueleza kuwa watu wa karibu na Nunez wamezipuuza taarifa hizo.
Kupitia ukurasa wake wa X, Romano alieleza:
"Vyanzo vilivyo karibu na mshambuliaji huyo vinapunguza uzito na kupuuza ripoti zinazohusu kurejea kwa Darwin Nunez pale Liverpool msimu huu wa kiangazi."
Romano hakugomea hapo tu; alikwenda mbali zaidi kwenye chaneli yake ya YouTube na kusisitiza kuwa hakuna mazungumzo yoyote yanayoendelea kati ya pande hizo mbili kwa sasa.
"Taarifa nilizonazo ni kwamba watu walio karibu na Darwin na kambi yake wanakanusha taarifa hizi. Wanasema si kweli, na hakuna chochote kinachoendelea kati ya Nunez na Liverpool kwa sasa."
Hata hivyo, mwandishi huyo aliongeza kuwa kuna matarajio makubwa kwa Nunez kujiunga na klabu mpya katika dirisha hili la kiangazi, ingawa kwa sasa hakuna makubaliano yoyote yaliyofikiwa na Liverpool.
Maisha ya Nunez: Kutoka Anfield hadi Saudi Arabia
Safari ya Darwin Nunez imekuwa na milima na mabonde mengi. Alujiunga na Liverpool akitokea Benfica kabla ya kuanza kwa msimu wa 2021/22 kwa dau kubwa la pauni milioni 64, baada ya kufunga mabao 34 katika michezo 41 msimu uliotangulia.
Ingawa alipokelewa kwa mbwembwe nyingi pale Anfield, kiwango chake kikawa cha kusuasua. Alionyesha cheche za hatari nyakati fulani, lakini alikosolewa sana kwa kukosa utulivu mbele ya lango, akifanikiwa kufunga mabao 40 tu katika michezo 143 aliyoitumikia miamba hiyo ya Premier League.
Uamuzi wake wa kujiunga na Al-Hilal msimu uliopita ulionekana kama fursa ya kuanza upya. Licha ya kufunga mabao 9 katika michezo 24 aliyoichezea Al-Hilal, uhusiano wake na klabu hiyo ya Mashariki ya Kati umeripotiwa kuingia ufa katika miezi ya hivi karibuni.
Kuwasili kwa mkongwe Karim Benzema kulimfanya Nunez kupoteza nafasi kwenye kikosi cha kwanza, na mbaya zaidi akaachwa nje ya kikosi kinachoshiriki michuano ya Klabu Bingwa Asia (AFC Champions League). Ripoti za hivi karibuni zinaeleza kuwa Nunez na Al-Hilal wamekubaliana kuvunja mkataba ili aondoke kama mchezaji huru msimu huu, hatua inayomfanya kuvutia klabu mbalimbali barani Ulaya.
